کون کہتا ھے کہ تجھ سی کوئی صُورت نہ مِلی

کون کہتا ھے کہ تجھ سی کوئی صُورت نہ مِلی
ھاں مگر مجھ کو تِری یاد سے مہلت نہ مِلی

درد چمکا کہ مِری رُوح میں سُورج اُترا
عُمر بھر راہِ وفا میں کہیں ظُلمت نہ مِلی
...
زندگی آج بھی بھرپُور ھے اُن کے دَم سے
جن کو فرہاد کے انجام سے عبرت نہ مِلی

مجھ کو اُس شخص کے افلاس پہ رحم آتا ھے
جس کو ھر چیز مِلی، صرف محبّت نہ مِلی

وہ بھی کیا علم ـــــ کہ جس سے تجھے ـــــ اے بحرِ علُوم!
دِل کی وُسعت نہ مِلی، غم کی دیانت نہ مِلی

سرِ بازار کہیں جُرم نہ ھو ھنسنا بھی
سرِ دربار تو رونے کی بھی فرصت نہ مِلی

مار ڈالے گا اُسے جُرم کا احساس ندیم
قتل کر کے جسے، مقتوُل پہ سبقت نہ مِلی

احمد ندیم قاسمی