ye jo diivaane se do chaar nazar aate hain
in mein kuchh saahib-e-asraar nazar aate hain
terii mahafil kaa bharam rakahate hain so jaate hain
varnaa ye log to bedaar nazar aate hain
duur tak ko_ii sitaaraa hai na ko_ii juganuu
marg-e-ummiid ke aasaar nazar aate hain
mere daaman mein sharaaron ke sivaa kuchh bhii nahiin
aap phuulon ke Khariidaar nazar aate hain
kal jise chhuu nahiin sakatii thii farishton kii nazar
aaj vo raunaq-e-baazaar nazar aate hain
hashr mein kaun gavaahii merii degaa 'Sagar'
sab tumhaare hii taraf_Daar nazar aate hai
No comments:
Post a Comment